إن كان حبيبك قمر
اطفيه وخش ونام
بينك وبينه زحمة الأيام
والمشغوليات اللى واخده وقت كل البشر
إن كان حبيبك قمر
نزّل عليه الستارة
اقفل عليه الشيش
وان كان فى أودة النوم معاك تكييف … شغّله
علشان ماتسمعشى موسيقى فى الأحلام
إن كان حبيبك قمر
قول له بلاش تنطيط
شكلك غلط يا قمر
وانت لوحدك عبيط
روّح بقى يا قمر
يمكن تلاقى ميكروباص لسه
رايح لبيتكو فى آخر التخطيط
مساكن سبيكو فى مدينة السلام
إن كان حبيبك قمرانزل له فى الشارع
ما دمت يعنى عليه كده حتموت
أصل القمر ممنوع يخش بيوت
انده له ينزل م السما للأرض
وحبوا بعض فى دكة فى جنينة
أو فى المقطم وانتوا فى العربية
أو على الكورنيش وتاكلوا كبده
فى طريق الجيش تسد جوعك وجوعه
وخشوا سيما
وحط كوعك فى كوعه
لهلب شفايفه وشفايفك بالفشار واللب
وحب فيه قد البطل ما يحب
واهى كلها أفلام
لو كان حبيبك قمر
بكره حيبقى محاق
وبعد بكره هلال
وبعد بعده بدر
يفضل كده مربوط
فى ساقية الملكوت
يموت ويحيا يموت ويحيا يموت ويحيا يموت
وانت وراه عاشق نحيل مصفوط
عايش على الأوهام
إن كان حبيبك قمر
اطفيه وخش ونام
امين حدّاد
No comments:
Post a Comment