أن أتلاشى...

بعدسه نهى رضا

حزن عادى ..جداً

حزن ثقيل يجثم على صدرى يمنع قلبى من الإستمتاع بدفء الشتاء الطيب, يحول دون وصول شمسه لذلك الرابض خلف ضلوعى.. ذكريات تحوم حول هاله الضوء التى تبثّها الشمعه ولا يؤنسها سوى حزن فيروز فى خلفيه صوتها..

كل يوم أعود لمنزلى فيبدأ ذلك الهم يزحف بطيئاً حيث يستقر فوق قلبى ..

ذلك الهم الذى يضيع بين الزحام وضجيج النهار ويعود ليستوحش فى الليل منفرداً بى ليذكرنى بكل من رحلوا وبكل نافذة حلم اُغلقت فى وجهى بعنف..

أتذكرك كثيراً تلك الأيام ربما لأننا فى مثل هذا التوقيت منذ عام تقابلنا

عام!!!

كم يدهشنى الزمان بإنفلاته سريعاً هكذا قبل أن أصحو ليعود متسللاً بعد أن أنام...

اشعر بك مع كل همهمة وكل حركة سكون حتى أصبحت كل إيماءاتى إبتهالات تناجى الإله أن يخلصنى من كل ذلك الحزن الذى أخشى أن ينفلت منى فتموت أنت بداخلى...

أتركنى أذوب بثبات كما تلك الشمعه أمامى ..وحيده ..حزينه..لكن ثابته فى مكانها..تاركه ضوئها يعلو ويعلو على تموجات كمان منكسرة تشكو إغترابها لضربات عود متمهل يذكرها دائما أن ما قد كان لن يعود أبداً....

القله ممليه على الشباك منديّة

أعراض إنسحاب

أنا واقفة هنا بقالى ساعتين ..

إنتِ فين؟

إمبارح لما شفتينى كنا بنتمشى ع الكوبرى...هي فضلت تتكلم تتكلم تتكلم..أنا ماكنتش سامعاها..بس بهز رأسى كدة كل ماتسألنى ..فاهمانى؟..ولما ألقاها ضحكت بصوت عالى أبتسم الإبتسامة اللزجة ديه كأن عندى مغص..عرفاها؟

كانت بتتكلم عنه تقريبا...

بيوحشنى طول ما إحنا بعيد وأول ما نقرب أتخنق وأحس إنى مش قادرة أتنفس...أحس إنّى أنا مش أنا ..موقفى من الحياة واضح وآجى قدامه مجالى المغناطيسى يتفرتك..أقوم أبعد شويه أستجمع ألوان خطوطى...وأفضل أتخيله قصادى وأحكيله كل حاجة كل حاجة...

إنتِ خلاص مخك لحس..أنصحك تروحى لدكتور نفسانى قبل ماتمشى تضربى الناس فى الشارع...
متفكرنيش واحدة زى الهجمة طلعت المترو إمبارح فضلت تغنى الأغانى اللى كنا بنغنيها زمان فى الفسحة وبعد كدة قعدت تشتمنا كلنا...

عملتى إيه لما مسك إيديكى أول مرة فى الحفله؟

نزلت من العربيه طبعاً ووقفت عالمحطة...مش ناقصة جنان...

كنتِ خايفة؟

عماله ألف وأدور فى دماغى وهو بيلف ويدور حوالين نفسه...

هترّوحى إمتى؟

الوقت متأخر وهو كمان مش بيسمعنى..

وبعدين سابها تقفل الباب على آخره حتى الشبابيك مبتدخلش منها الشمس..

إكمن الدنيا شتا والمطر هيغرق الدنيا..

كدة كدة برد..

ما إنتِ عارفة..

عارفة.

أقصد الدكتور..بقالك كتير بتشتكى من النغزة اللى فى قلبك ديه...

هي قالتله وإنتَ ماشى مترجعش حاجة أخدتها..مش هتكون زى ماكانت..مش عاوزاها أحسن..

أحسن أحسن..أنا كدة كدة قشطة يعنى..

طيب.

وهتعملى إيه يا فالحة لو عرف يقراها؟

لاء ما أنا أخدت الكتابين بتوعى..والصور ضاعت مع الرسايل..

طول عمره كدة بيحب يقرأ الكتب المرصوصين عالرف..لكن ما يعرفش يفتح كتاب مركون لوحده على جنب...

حتى لو حطتيه بين الكتب على الرفوف هيتوه منه...

خلقة ربنا يا ستى هنعترض على حكمته بقى؟!

أنا صدعت..خلصتى؟

خليك فى حالك...

عطشانة ..وإنتِ؟

خليكِ فى حالك قلت.

لما قالّها عاوز أمشى مردتش عليه وأديتله ضهرها ومشيت ..إستغرب أوى!!!

حاجة غريبه والله..

هما الإتنين مجانين..

يعنى دول اللى عاقلين؟

نسيتى ؟

أيوة.. لما روحت كنت لسه سرحانة فى صوت العود...

نسيتى ؟
أيوة ...الله.

رايحه فين؟

يعنى هنروح من بعض فين...

طيب شغلى أغنية قديمة..

حلوة طير بينا ياقلبى ومتقوليش السكة منين؟

هيا ناقصه؟!!

بس مناسبه لحاله الطيران اللى إنتى فيها...

والنبى تتلهى ...قال طيران قال...

أحسن حاجة تحطى سدادتين فى ودانك وتدخلى الفقاعه..

أنا بتكلم عن تدخلهم فى حياتك..

بس أنا بتكلم عنه......

خفيتى؟

أنا كمان إتعودت أتنفس لحد مانسيت أفكّر نفسى كل يوم الصبح إنى لسه عايشه...

راضية باللى إنتِ وصلتيله؟

بصحى الصبح آخد دش وأشرب قهوة باللبن وأسقى الشجر وأقعد أكمل الشغل اللى سبته بالليل وأشغل حته المزيكا اللى عملت أول شرارة بينا وأسيبها تفك طلاسم حياتى...

راضية باللى إنتِ وصلتيله؟

"إعتقدت دوماً أنَها لرجل واحد فقط وحين آتاها أقسمتْ ألاّ يلمسها رَجلٌ بعده ففضّلت أنْ تتركُه كيْ لا ينتهى الحُب"

أيوة وبالنسبة للتشكيل ؟!

ياشيخه روحى بقى...إبقى إسألى لمّا تلاقينى رميت كل الكتب والصور من الشباك ..وكسرت إسطوانات فيروز ومسحت أغانى منير من روحى..وبطلت أتمشى لوحدى هناك.....

ووسط البلد؟

لمّا يهدّوها ويردموا بها النيل..

خليكِ إنتِ كدة كل ماتشوفى إتنين بيطبطبوا على بعض تقعدى تعيطى...

متستعجليش على نفسك..فى الوقت ده هتحسى إنه بيخرج من جواكِ زى الروح الملعونة اللى لما صاحبها يجى يموت تتقطع كأنها حتة صوف بيخرج منها عود شوك...

مش ناويه تبطلى بقى؟

ياهبله بيزقوكى علشان تعيدى التاريخ بدل ماتغيريه...

كمان!!!

لميتى كل حاجة ..اللى ليكى واللى ملكيش...مش ممكن تغيرى رأيك؟

متأكدة.

وإنتِ؟

خليكِ فى حالك.

.............